पिंपळगाव हरेश्वर ( प्रा. अमोल झेरवाल):
ग्राम विकास मंडळ संचलित ग्रामविकास विद्यालय व कनिष्ठ महाविद्यालय, पिंपळगाव हरेश्वर येथे हुतात्मा दिनानिमित्त देशासाठी बलिदान देणाऱ्या हुतात्म्यांना भावपूर्ण आदरांजली अर्पण करण्यात आली. महात्मा गांधी यांच्या पुण्यतिथीचे औचित्य साधून आयोजित या कार्यक्रमात विद्यालय परिसरात गंभीर व प्रेरणादायी वातावरण निर्माण झाले होते.
कार्यक्रमाच्या अध्यक्षस्थानी विद्यालयाचे प्राचार्य पी. जे. तेली होते. यावेळी उपप्राचार्य प्रा. पी ओ चौधरी, पर्यवेक्षक पी. आर. देशमुख व पी. ए. जाधव यांच्यासह सर्व शिक्षक-शिक्षिका, शिक्षकेतर कर्मचारी तसेच मोठ्या संख्येने विद्यार्थी-विद्यार्थिनी उपस्थित होते.
कार्यक्रमाची सुरुवात हुतात्म्यांच्या प्रतिमेला पुष्पांजली अर्पण करून करण्यात आली. त्यानंतर संदीप पाटील यांनी हुतात्म्यांच्या कार्याचा गौरवपूर्ण परिचय करून देत त्यांच्या त्यागाची आणि देशसेवेची प्रेरणादायी माहिती विद्यार्थ्यांसमोर मांडली. त्यांच्या भाषणातून देशभक्ती, कर्तव्यनिष्ठा व सामाजिक जबाबदारी यांचे महत्त्व अधोरेखित करण्यात आले.
यानंतर उपस्थित सर्वांनी दोन मिनिटे स्तब्ध उभे राहून राष्ट्रासाठी बलिदान देणाऱ्या वीरांना आदरांजली वाहिली. या क्षणी संपूर्ण परिसरात शांतता पसरली होती आणि प्रत्येकाच्या चेहऱ्यावर कृतज्ञतेची भावना स्पष्ट दिसत होती.
कार्यक्रमाच्या शेवटी विद्यार्थ्यांना देशप्रेम, शिस्त आणि समाजसेवा या मूल्यांचे पालन करण्याचे आवाहन करण्यात आले. हुतात्मा दिनाचा हा कार्यक्रम विद्यार्थ्यांच्या मनात देशभक्तीची भावना जागृत करणारा ठरला.
