तालुक्यात आमदारांचा वाढदिवस ठरणार आगळावेगळा — १ नोव्हेंबरला ‘निर्धार मेळावा’ आयोजित
पाचोरा– येत्या १ नोव्हेंबर रोजी तालुक्यातील राजकीय वातावरणात नवा उत्साह निर्माण होणार आहे. कारण या दिवशी आमदारांचा वाढदिवस केवळ उत्सव न राहता, तो ‘निर्धार मेळावा’ या नावाने जनतेसाठी एक ऐतिहासिक क्षण ठरणार आहे.
या मेळाव्याद्वारे आमदारांनी जाहीर केले आहे की, येणाऱ्या निवडणुकीत ते स्वतंत्रपणे निवडणूक लढविणार असून, शिवसेनेचा भगवा झेंडा तालुक्यात फडकाविण्याचा निर्धार त्यांनी व्यक्त केला आहे.
आमदारांनी सांगितले की, “माझा वाढदिवस हा केवळ औपचारिक सोहळा नसून, तो जनतेशी नव्या बांधिलकीचा दिवस आहे. आपले हक्क, आपला स्वाभिमान आणि आपली भूमिका स्पष्ट करण्यासाठी हा मेळावा आयोजित केला आहे. तालुक्यात शिवसेनेचा भगवा झेंडा पुन्हा फडकविण्यासाठी आपण सर्वजण एकत्र यावे.”
यावेळी आमदारांनी सर्व नागरिकांना १ नोव्हेंबर रोजी होणाऱ्या ‘निर्धार मेळाव्यास’ मोठ्या संख्येने उपस्थित राहण्याचे आवाहन केले आहे. या मेळाव्यात विविध ग्रामपंचायतींचे पदाधिकारी, कार्यकर्ते, महिला आणि युवक मोठ्या प्रमाणावर सहभागी होणार असल्याची माहिती मिळाली आहे.
तालुक्यात या मेळाव्याची चर्चा सध्या चांगलीच रंगली असून, आमदारांच्या या निर्णयाकडे सर्वांचे लक्ष लागले आहे. वाढदिवसाच्या निमित्ताने राजकीय पातळीवर नवीन समीकरणे घडणार की काय, याबाबत जनतेत उत्सुकता आहे.
