धुळे जिल्हा सुरक्षा बोर्डाच्या पुढाकारातून आयोजन; आधुनिक सुरक्षा तंत्र, अग्निसुरक्षा आणि सीपीआरचे प्रशिक्षण
जळगाव | प्रा अमोल झेरवाल
धुळे जिल्हा सुरक्षा बोर्डाच्या माध्यमातून जळगाव, धुळे आणि नंदुरबार जिल्ह्यांतील सुरक्षा रक्षकांसाठी आयोजित करण्यात आलेले तीन दिवसीय प्रशिक्षण शिबिर यशस्वीरित्या संपन्न झाले. जळगाव येथील हतनूर सांस्कृतिक हॉलमध्ये ७ ते ९ ऑक्टोबर २०२६ या कालावधीत ट्रेनिंगफिनिटी अकॅडमीच्या माध्यमातून हे प्रशिक्षण घेण्यात आले. या प्रशिक्षणात मोठ्या संख्येने सुरक्षा रक्षकांनी सहभाग घेतला. प्रशिक्षण पूर्ण केलेल्या सर्व सहभागी सुरक्षा रक्षकांना प्रमाणपत्रांचे वितरण करण्यात आले.
सध्याच्या काळात विविध शासकीय कार्यालये, औद्योगिक आस्थापना, शैक्षणिक संस्था, रुग्णालये, बँका आणि खासगी संस्थांमध्ये सुरक्षा रक्षकांची भूमिका महत्त्वपूर्ण आहे. या पार्श्वभूमीवर सुरक्षा रक्षकांचे व्यावसायिक कौशल्य वाढविणे, आधुनिक सुरक्षा पद्धतींची माहिती देणे आणि आपत्कालीन परिस्थितीत प्रभावीपणे कार्य करण्यासाठी त्यांना सक्षम करणे, हा या प्रशिक्षणाचा प्रमुख उद्देश होता.
प्रशिक्षणादरम्यान बेसिक सिक्युरिटी कॉन्सेप्ट, सॉफ्ट स्किल्स, सिक्युरिटी इक्विपमेंट्स, बेसिक फायर अँड सेफ्टी, रेडिओ सेट कम्युनिकेशन, हँड-हेल्ड मेटल डिटेक्टर (HHMD), डोअर फ्रेम मेटल डिटेक्टर (DFMD), सीपीआर (CPR) तंत्र तसेच कामाच्या ठिकाणी महिलांच्या लैंगिक छळ प्रतिबंधासंदर्भातील पॉश (POSH) या विषयांचा समावेश होता.
सुरक्षा रक्षकांना कर्तव्य बजावताना आवश्यक असलेली दक्षता, शिस्त, संवादकौशल्य, संशयास्पद हालचालींचे निरीक्षण, सुरक्षा उपकरणांचा योग्य वापर आणि आपत्कालीन परिस्थितीत त्वरित प्रतिसाद देण्याच्या पद्धतींबाबत मार्गदर्शन करण्यात आले. अग्निसुरक्षा आणि सीपीआर प्रशिक्षणाच्या माध्यमातून संकटाच्या वेळी प्राथमिक मदत कशी करावी, याची माहिती देण्यात आली. तसेच रेडिओ सेट कम्युनिकेशन आणि मेटल डिटेक्टरच्या वापरासंदर्भातही प्रशिक्षण देण्यात आले.
प्रशिक्षणाच्या समारोपापूर्वी घेण्यात आलेल्या बेसिक सिक्युरिटी ड्रिलमुळे सुरक्षा रक्षकांना प्रत्यक्ष कर्तव्य बजावताना आवश्यक असलेल्या कार्यपद्धतींचा सराव करण्याची संधी मिळाली. यामुळे आपल्या जबाबदाऱ्या अधिक स्पष्टपणे समजून घेणे, परिस्थितीनुसार योग्य निर्णय घेणे आणि आत्मविश्वासाने ड्युटी पार पाडणे यासाठी मदत झाली.
धुळे जिल्हा सुरक्षा बोर्डाचे अध्यक्ष डॉ. आर. डी. गुल्हाने आणि सचिव ए. के. छाटे यांच्या मार्गदर्शनाखाली या प्रशिक्षण उपक्रमाचे आयोजन करण्यात आले. ट्रेनिंगफिनिटी अकॅडमीचे मालक ऋषिकेश कोरडे सर यांच्या माध्यमातून प्रशिक्षण कार्यक्रम पार पडला. जळगाव, धुळे आणि नंदुरबार या तिन्ही जिल्ह्यांतील सुरक्षा रक्षकांना एकाच व्यासपीठावर आधुनिक सुरक्षा तंत्रांचे प्रशिक्षण मिळाल्याने या उपक्रमाला विशेष महत्त्व प्राप्त झाले.
प्रशिक्षण यशस्वीरीत्या पूर्ण केलेल्या सर्व सुरक्षा रक्षकांना प्रमाणपत्रे प्रदान करण्यात आली. सुरक्षा कर्मचाऱ्यांचे ज्ञान, कौशल्य आणि कार्यक्षमता वाढविण्यासाठी अशा प्रशिक्षण उपक्रमांचा उपयोग होतो. प्रशिक्षित सुरक्षा रक्षकांच्या माध्यमातून विविध आस्थापनांमधील सुरक्षा व्यवस्था अधिक सक्षम करण्यास मदत होईल, अशी अपेक्षा व्यक्त करण्यात आली.
