जळगाव | प्रा अमोल झेरवाल
मूळजी जेठा महाविद्यालय (स्वायत्त), जळगाव येथील पदार्थविज्ञान विभागाच्या वतीने प्रथम वर्षाच्या विद्यार्थ्यांसाठी स्वागत समारंभ व फ्रेशर्स पार्टीचे आयोजन ६ सप्टेंबर २०२६ रोजी उत्साहात करण्यात आले. या कार्यक्रमाला विभागातील शिक्षकवृंद आणि विद्यार्थी मोठ्या संख्येने उपस्थित होते.
कार्यक्रमाची सुरुवात दीपप्रज्वलन व सरस्वती पूजनाने झाली. यावेळी पदार्थविज्ञान विभागाच्या विभागप्रमुख डॉ. प्रतिभा निकम, इलेक्ट्रॉनिक्स विभागप्रमुख डॉ. कविता पाटील तसेच विभागातील सर्व शिक्षकवृंद उपस्थित होते.
नवागत विद्यार्थ्यांचे उत्साहपूर्ण स्वागत करून त्यांना महाविद्यालयीन जीवनातील विविध संधी, उपक्रम आणि शैक्षणिक वातावरणाची माहिती देण्यात आली. महाविद्यालयीन जीवनातील नव्या प्रवासाची सुरुवात करणाऱ्या विद्यार्थ्यांसाठी हा कार्यक्रम संवाद, परिचय आणि आनंदाचा एक महत्त्वपूर्ण प्रसंग ठरला.
कार्यक्रमात विद्यार्थ्यांनी नृत्य, गायन, कविता तसेच विविध सांस्कृतिक कार्यक्रम सादर करून उपस्थितांची दाद मिळवली. विविध मनोरंजक उपक्रमांमुळे संपूर्ण कार्यक्रमात उत्साहाचे आणि आनंदाचे वातावरण निर्माण झाले.
या स्वागत समारंभामुळे प्रथम वर्षाच्या विद्यार्थ्यांना महाविद्यालयातील वातावरणाशी परिचित होण्यासोबतच वरिष्ठ विद्यार्थी आणि नवीन मित्र-मैत्रिणींशी संवाद साधण्याची संधी मिळाली. त्यामुळे नवागत विद्यार्थ्यांमध्ये आत्मीयता आणि आपलेपणाची भावना निर्माण होण्यास मदत झाली.
कार्यक्रमाच्या यशस्वी आयोजनासाठी शिक्षक, कु. तनुष्का चिंचोरे, एम.एस्सी. प्रथम वर्षाच्या विद्यार्थी प्रतिनिधी तसेच द्वितीय आणि तृतीय वर्षातील विद्यार्थ्यांनी विशेष परिश्रम घेतले. त्यांच्या नियोजनामुळे कार्यक्रम उत्साहपूर्ण वातावरणात पार पडला.
‘मिस फ्रेशर’ व ‘मिस्टर फ्रेशर’ची निवड
कार्यक्रमातील विविध स्पर्धा, सांस्कृतिक उपक्रम आणि सहभागाच्या आधारे प्रथम वर्ष भौतिकशास्त्रातील विद्यार्थ्यांमधून कु. हिमेश्री मराठे यांची ‘मिस फ्रेशर’, तर यश माळी यांची ‘मिस्टर फ्रेशर’ म्हणून निवड करण्यात आली.
या दोन्ही विद्यार्थ्यांचा डॉ. कविता पाटील, अधिष्ठाता, विज्ञान शाखा, तसेच डॉ. प्रेमजीत जाधव आणि डॉ. विशाल भारूड यांच्या हस्ते गौरव करण्यात आला.
या सोहळ्यामुळे प्रथम वर्षाच्या विद्यार्थ्यांना महाविद्यालयीन जीवनाची उत्साही सुरुवात मिळाली असून, शिक्षणासोबत सांस्कृतिक आणि सामाजिक उपक्रमांमध्येही विद्यार्थ्यांनी सक्रिय सहभाग घ्यावा, असा सकारात्मक संदेश या कार्यक्रमातून मिळाला.
